Sharaftii Soomaaliya oo Dib u Soo Noqonaysa iyo Sharkii Qarandiidka oo Shuushkiisii Baxay

Waxaa jira dadka qaar had iyo jeer ciwaan ka dhigan jiray dhibaatadii baahsanayd ee wadanka ka dhacday iyada oo meel walba saamaysay aya sharwadayaasha nooc walba leh ee faraha badan waxay sheegi jireen in aan dib loo heli doonin rajo caasimada soomaaliya iftiinkeedii soo celisa .

 

Waxaa maanta wadooyinka muqdisho aad ku arkaysaa calamo kala duwan oo caalamka ah iyo madax fara badan oo aduunka ka socota iyo wafdiyo is hor iyo daba marayaa gurmad badan iyo indhaha dadka jecel danaha soomaaliya oo si toosa u eegayaa duruufaha xaaladeed ee ka jira.

 

Maxaad qabtaana qalbigay qaboojisaa waxaa la yidhi warkii wacaniba ninbuu waran ku yahee waxaa jira qoom badan oo aan jeclayn nabada , magaca umada soomaaliyeed inuu sidiisii ku soo noqdo iyo in la helo qaranimadii soomaaliyeed qiimahay aduunka ka lahayd.

 

Hadaba aniga oo aan farta ku taagayn waxaan leeyahay dadkii odhan jiray dowladi ma jirto hadaba ha daawadeen , nidaamka iyo kala danbaynta dib usoo celinta qaranimada soomaaliyeed hanaankay ku socoto.

 

Kuwii meelaha ku shaxaadi jiray muqdisho nabad maaha oo waa bahalo galeen ee mashaariicda ku doonayayna rajadoodii waxay gashay dhulka waxaanay ku hungoobeen siyaasadii qalafsanayd ee qabyaalada iyo xiqdiga iyo xaasidnimada ku salaysnayd ee qaranimada soomaliyeed lagu waayay.

 

Wadamada Maanta is garabtaaga dib usoo celinta sharafta soomaaliyeed shacabka soomaaliyeed way xasuusnaan doonaan waxayna u hayn doonaan abaal iyo wanaag aan la ilaawi doonin waxanan lagu qori doonaa diiwaanka kaydka taariikhda soomalida.

 

Hadaba Haddii laga adkaado cadowga hubka haysta waxaa iyaguna dagaal u baahan kuwa aan hubka sidan ee wada qalaanqalka iyo qaska ee waliba masuuliyadaha haya ee had iyo jeer niyadjabka iyo warxumatashiilka la wareega.

 

Waxay dowladii dhexe dhacday maalintii muqdisho burburtay waxaana meeshaas ku dhamaaday magacii dowladnimo waxaana maanta muqdisho dib uga aloosnay magacii dowladnimo taas ayaa waxay markhaati ka tahay ama ha xumaato ama ha samaato ama ha tabaryaraato ama ha xoog badnaato , in dawadii wadadeedii la hayo.

 

Waxaa maahmaah soomaaliyeed tidhaahdaa (Aji Fal dhiman lama tuso) Qolyaha farsamayaqaaniinta soomaaliyeed ayaa markay wax samaynayaa qofka aan aqoon xirfada wuu soo boodaa ka dayaa sidaa maahee war bal sug hawsha waan wadaa ayuu farsamayaqaanku ku yidhaahdaa isaga oo og aqoondarida ka haysata dhinaca farsamada waxayna kula tiraabaan maahmaahdaa aan kor ku soo sheegay isla hadana soomali dowladnimada intay dhamaystirmayso ee hay, adaha dowliga ahi shaqo bilaabayan amaanka iyo kala danbaynta iyo nidaamka la helo way sugi la,yihiin waxaadna moodaa dhaliisha iyo canbaaraynta mooyee saadaasha wanaagsan iyo raja gelinta inay ku yar tahay .

 

Waxaad arkaysa nin wayn oo maamul dowladeed ka soo shaqeeyay soo bartay nidaamka maamulka iyo maaraynta xirfad u leh oo ku odhanayaa waxba meesha ma yaalaan dowladi ma jirto, dowladnimada miyaa la soo iibiyaa, ma meelbaa laga keenaa ma raashin dubai yaala saw maaha inay shacabka soomaaliyeed dareemaan inay dowladnimadu ka maqan tahay oo gacmaha is qabsadaan oo taageeraan xukuumada jirta waxay doontaba ha ahaatee si loo gaadho meeshii la rabay dowladnimadu waxaa markii horena loo soo maray wado dheer markan waxaa loo marayaa isla wadadii dheerayd waxayna wax u taraysaa qofkii dareemayaa ee waxba ka tari mayso qof aan aqoon waxaan leeyahay dadka had iyo jeer xumaatada iyo dhibaatada jeceloow wuu dhamaaday waqtigiinii waxaa la gaadhay waqtigii dowladnimada, daacadnimada, deganaanta iyo daryeelka shacabka soomaaliyeed ee dastuurka lagu kala bixi lahaa , nin walibana waxuu kasbado qaadan lahaa waxaan ku soo afjarayaa hadalkayga.

 

 

Waxaan waaga beryaba

Walaaciyo foorariyo

Walaahoow laygu rido

Wareerkuna sii batoo

Warkeeda markaan maqloba

Wajaac igu soo dhacoo

Waxaan wadankaan jeclaa

Ka waasho inaan tagoo

Wiiftiyo xabadiyo dagaal

Waaqliyo hoobiyo onkoda

Rasaas walaclaynaysiyo

Wed iyo dhagar joogta ahi

Walaaqo dadkayga oo

Waxyeeluun laga waramo

Hadaan warsan iyo wanaag

Weedhii aan rabay maqloo

War aan la dhacaan helloo

Wadaadadii xumaha waday

Waqtigaa ka dhamaadayoo

Waagoodii baa dumoo

Awood wiiqdaa la helay

Waxaa wadankii ka jira

wadaado xumaatado wada

wareershay islaamkiyoo

wadiiqo xun noo furoo

waxaan jirin sheegayoo

waxaan dhicin raadiyoo

dadkii weger wada dhaheen

waxaa wadankeena jira

Wadani sama doonayiyo

Wanaaja dal iyo dadkoo

Wareer na ka dhawrayoo

Wahsigu uu ceeb ku yahay

Waagii berya taaganoo

Ka weera xumaatadiyo

Weerkiyo bahala wax cuna

Waxay shacabkii fahmeen

Waxay shalay soo maroo

Wadadii lagu soo dhagriyo

Waawaraydii lagu qaldiyo

Warkii lagu buufin jiray

Hadana wacad bay galeen

Is weheshiga daacadnimo

Walaalnimadooda mudan

Inaanan la wiiqin abid

Waraabaha laga jiroo

Wakiilka xumaanta wada

Kuwaa wadankooda neceb

Warmaha loo qaata oo

Wadajir laysaga dhacshoo

Wareerkana laga baxoo

Wiil iyo sida waalidkii

Wadanka loo wadajiroo

Wanaag la horseeda oo

La weheshado dowladnimo…

Waa Qalinkii

Cabdiraxiin Hilowle Galayr

Galayr1977@hotmail.com